SAET ÇEND E?
Dema ku em bixwazin saetê bipirsin, em bi alîkarîya bêjeyên "çend" û "çi"yê dipirsin.
- Saet çend e?
- Saet çi ye?
Di gotina saetê da têgihên "berî nîvroyê" (kurtkirin: bn) û "piştî nîvroyê" (kurtkirin: pn) tên bikaranîn.
Li gor vê yekê, ev nimûne bi vî awayî tên nivîsîn û bilêvkirin:
- Mînak: 08:30 bn
- Bilêvkirin: 1. Heşt û nîvê berî nîvroyê. 2. Heşt û nîv bn
- Mînak: 09:30 pn
- Bilêvkirin: 1. Neh û nîvê piştî nîvroyê. 2. Neh û nîv pn
Eger aşkera be ku dem berî yan jî piştî nîvroyê ye "berî nîvroyê" û "piştî nîvroyê" neyên gotin jî dibe.
- Mînak: 06:30
- Bilêvkirin: Saet şeş û nîv e.
1. Dema ku saet tê pirsîn bersiv piştî bêjeya "saet"ê tê gotin:
- 05:00 bn Saet pêncê berî nîvroyê ye.
- 08:00 pn Saet heştê piştî nîvroyê ye.
- 02:00 Saet du ye.
2. Dema ku saet "nîv" be, saeta tam tê gotin, paşê gihaneka "û"yê, herî dawî jî bêjeya "nîv"ê tê bikaranîn.
- 02:30 bn Saet du û nîvê berî nîvroyê ye.
- 07:30 pn Saet heft û nîvê piştî nîvroyê ye.
- 09:30 Saet neh û nîv e.
3. Dema ku piştî saetên tam, deqîqe bên dîyarkirin, ev deqîqe bi alîkarîya gihaneka "û"yê li ser saeta tam tên zêdekirin:
- 02:09 bn Saet du û neh deqîqeyê berî nîvroyê ye.
- 04:20 pn Saet çar û bîst deqîqeyê piştî nîvroyê ye.
- 03:05 Saet sê û pênc deqîqe ye.
Dema ku bêjeya "deqîqe"yê neyê gotin jî heman manayê dide:
- 02:10 bn Saet du û dehê berî nîvroyê ye.
- 03:05 pn Saet sê û pêncê piştî nîvroyê ye.
- 06:20 Saet şeş û bîst e.