B- ÇEND

Dema ku em hejmara tiştan dipirsin, em bêjeya "çend"ê bi kar tînin.

1. Eger "çend", berî navan bê bikaranîn, hejmara wan dipirse.

• Bîst xwendekar di polê da ne.
• Çend xwendekar di polê da ne?
• Şeş qelem li ser maseyê ne.
• Çend qelem li ser maseyê ne?
• Çil û sê kes di salonê da ne.
• Çend kes di salonê da ne?

2. Eger "çend" li şûna navan bê bikaranîn, pirsa tişt yan kesan dike û cihnava pirsyarîyê ye.

• Wê du xwarin, yek hişt.
• Wê çend xwarin, çend hiştin?
• Rêveber çaran dişîne, pêncan dihêle.
• Rêveber çendan dişîne, çendan dihêle?

Hişyarî

Bêjeya "çend"ê di manaya "hinek"ê da jî tê bikaranîn. Wê demê ev çend ne ji bo pirsînê ye, ji bo dîyarkirina hejmarê ye.

• Çend heval li wir in.
• Çend qelem di çenteyî da ne.
• Çend kûçik di hewşê da ne.
• Çend pêlav li ber derîyî ne.
• Çend xwendekar di polê da ne.
• Çend sêv sor in.